Белая трость

“Үрүҥ торуоска” аахсыйа

 

Сэтинньи 24 күнүгэр  Баатаҕайдааҕы култуура уонна спорт киинигэр Аан дойдутааҕы үрүҥ торуоска күнүн чэрчитинэн, Верхоянскай оройуонун мөлтөхтүк көрөр дьон уопсастыбатын (бэрэссэдээтэлэ М.С. Васильева) көҕүлээһининэн “Үрүҥ торуоска” аахсыйа буолан ааста.

Foto1

“Үрүҥ торуоска” диэн өйдөбүл аан маҥнайгы хайдах үөскээбитин, ханнык дойдуттан нуучча, саха тылыгар кэлбитин, хас сыллаахтан маннык күн бэлиэтэнэр буолбутун туһунан Верхоянскай оройуонун бибилэтиэкэтин исписэлииһэ Яна Сыромятникова сиһилии кэпсээтэ.

 

Дьааҥы мөлтөхтүк көрөөччүлэрэ уонна ыҥырыылаах ыалдьыттар кыттыылаах төгүрүк остуол тэрилиннэ. Тэррэһин Дьааҥы оройуонун баһылыгын бастакы солбуйааччыта Николай Корнилов кыттааччылары уонна ыалдьыттары эҕэрдэлээһининэн саҕаланна.  Мунньахха оройуон араас социальнай өҥөнү оҥорор тэрилтэлэрин салайааччылара уонна тутаах үлэһиттэрэ харахтарынан инбэлииттэргэ анаан туһалаах информацияны эттилэр. Ол курдук, олохтоох дьаһалта Дьарыктаах буолуу сулууспатын исписэлииһэ Екатерина Горохова, “Мин дөкүмүөннэрим” элбэх функциялаах киин салайааччыта Светлана Ширяева, Пенсионнай пуонда начаалынньыга Александр Неустроев, “Верхоянскайдааҕы ОКБ” ГБУ бырааһа Евдокия Стручкова, Нэһилиэнньэ социальнай харалтатын салайааччыта Наталья Потапова, Дьиэ кэргэҥҥэ уонна оҕолорго көмө киинин исписэлиистэрэ  бэйэлэрин үлэлэринэн элбэх тустаах дьоҥҥо туһалаах информацияны кэпсээн, мустубут дьону барыларын да интэриһиргэттилэр. Мөлтөхтук көрөөччүлэр чуолаан эмтэниигэ, маннык категорияҕа киирсэр дьоҥҥо көмөҕө сыһыаннах ыйытыылары биэрдилэр.

Foto2

Тэрээһин иккис чааһыгар талаан көрүүтүн күрэҕин оройуоннааҕы бибилэтиэкэ ИПК сэбиэдиссэйэ Ольга Бурцева ыытта. Манна уопсайа биэс хараҕынан мөлтөх киһи кыттыыны ылла.

Саамай эдэркээн кыыттааччы сэттэ саастаах, бастакы кылаас үөрэнээччитэ Айза Барамыгина бэйэтин кыра сааһыгар киэн хабааннаах билиитинэн-көрүүтүнэн, доргуччу  хоһоон ааҕан көрөөччүлэри сөхтөрдө.

Күрэххэ Верхоянскай оройуонун мөлтөхтүк көрөр дьон уопсастыбатын бэрэссэдээтэлэ Мария Васильева эмиэ кытынна. Кини бэйэтэ тикпит араас оҥоһуктарын көрдөрдө. Дьүүллүүр сүбэ быһаарыытынан үһүс миэстэни бэйэтэ айбыт хоһооннорун хомурунньугун көрдөрбүт Элгэстэн сылдьар Ньургуйаана Рожина буолла, иккис миэстэни эмиэ Элгэс нэһилиэгиттэн төрүттээх ыллан көрдөрбүт Туйаара Потапова ылла. Күрэх кыайыылааҕынан ыллыыр дьоҕурунан, ас астыыр талаанынан Баатаҕайтан сылдьар Любовь Слепцова сүктэ.

foto3

 

 

 

Мария МАКАРОВА,

оройуоннааҕы ИПК эрэдээктэрэ.